19 de outubro de 2023.

Movhera ajuda la Cruç Burmeilha Pertuesa an Trás-de-ls-Montes i Alto Douro

Ne l campo de la sue Política de Respunsablidade Social i Corporatiba, la Movhera resolbiu ajudar, c’un balor de binte mil ouros al anho, las subdelegaçones de Murça i Alijó i la delegaçon de Bergáncia de la Cruç Burmeilha Pertuesa, por bias de l’amportáncia destas anstituiçones ne l território i na populaçon de Trás-de-ls-Montes i Alto Douro.

Por meio de candidatura, l subcílio será dado a ua subdelegaçon ou a dalguas deilhas, apartadas ou todas juntas, sendo que cada candidatura puode tener más do que un punto. L subcílio será ua beç por anho, antre 2024 i 2027.

La abaluaçon de las candidaturas tenerá an cuonta l quanto ye de amportante la necidade de l ambestimiento para que se puodan cumprir las cumpeténcias fundamentales de la subdelegaçon; la susteniblidade ambiental i l sfuorço pa la mudança einergética que la prepuosta apersenta ne l campo de la sue atebidade i la eifecéncia eiquenómica de la prepuosta, antre outros critérios.

Agradecendo esta einiciatiba de la Movhera, l Delegado Regional de Bergáncia de la Cruç Burmeilha Pertuesa diç que la mesma ajuda “l zambuolbimiento de la misson social i houmanitaira de la Cruç Burmeilha Pertuesa ne l çtrito de Bergáncia”.

Las candidaturas para 2024 stan abiertas deiqui an delantre.

13 de julho de 2022.

Movhera i Just a Change assinan cumben de colaboraçon cun Cámaras

La Movhera i la Just a Change acában de assinar  un cumben de colaboraçon, que abarca l porgrama ‘Camp In‘ para beluntários maiores d’eidade a modos de campo de férias, cun trés Cámaras de Trás-ls-Montes i Alto Douro.

An associaçon culas Cámaras de Torre de Muncorbo, de Miranda i de Alijó (cun quien l cumben será assinado l die 25 de julho), esta colaboraçon bai a promober l amanho de catorze casas durante l més de agosto. Suobre l mote ‘Amanhar Casas i Recunstruir Bidas’, son quinze dies de muitos trabalhos de obra an casas de famílias necitadas, mobelizaçon i cumbíbio cula quemunidade de l lhugar, todo siempre cun sprito animado i sien preacupaçones.

La Just a Change ye ua Associaçon sien Fins de Ganáncia que amanha casas de pessonas precisadas an Pertual. Até hoije, l Just a Change amanhou cientos de casas i anstituiçones, tenendo mobelizado miles de beluntários andrento i fuora de l paíç. Esta associaçon zambuolbe bários porgramas d’anterbençon que permíten la atuaçon an bariados cuntestos a la par, potenciando assi l ampacto social i la coeson social nas quemunidades de l lhugar.

“Pa la Movhera este cumben amostra la gana que tenemos an dar cuntribuiçones pal zambuolbimiento i pal cumbate a la pobreza einergética i habitacional na region de Trás-ls-Montes i Alto Douro. Desta maneira cuntamos ajudar a mobelizar agentes locales, para assinalar causos de pobreza habitacional i ousar las medidas de la Just a Change para sculhir ls causos que seran albo d’anterbençon, dando ajuda a porjetos queajúden l zambuolbimiento de la region i la criaçon de melhores cundiçones de bida”, diç Bertrand Fauchet, Maioral de la Movhera.

3 de setembro de 2021.

La Movhera bai a spolmar na barraige de Miranda

Tal cumo ye apuntado ne l sou porgrama de ambestimientos, caras a melhorar la funcion de las sues centrales heidroeilétricas, la Movhera ampeçará mui debrebe a spolmar (sacar la nata de arena de l fondo de l riu) na barraige de Miranda.

L modo scolhido pa la spolmaige, debidamente abaluado i aporbado por quien de dreito, fui pensado de maneira a abrandar ls possibles stragos ambientales i de la paisaige i abrandar las restriçones a la passaige i a las  serbenties nesses sítios. Todos ls parámetros amportantes para estas obras ban a star a toda la hora sujeitos a la mirada técnica por antidades certeficadas, que usaran porcessos aprobados adelantradamente. Cuntamos que estas ouparaçones steian acabadas até fin de berano.

Se por bias destes trabalhos bos dirdes de cuonta de algo stranho na Barraige de Miranda, la Movhera pide que, ato cuntino, le deiades parte.

La Movhera agradece la colaboraçon de la Cámara de Miranda, de la Agéncia Pertuesa de l Ambiente, I.P. i al Anstituto de Cunserbaçon de la Natureza i Florestas, I.P..

18 de agosto de 2021.

La Movhera ajuda a acoutelar ls fogos

Ne l campo de las medidas de Reduçon de l Peligro de Fogos a la borda de las sues cuncessones, la Movhera cuntratou la Aflodounorte para fazer, poner i mantener dues Torres de Begila na region de l Tua.

La purmeira Torre de Begila yá fui antregue i quedou puosta na Micro-reserba de Abreiro. Ouferece uas bistas ótimas suobre grande parte de las ourrietas de l Riu Tua, que son menos ouserbadas zde la Rede Nacional de Postos de Begila (RNPV) que hai na region i dá a las eiquipas cuntratadas por la Movhera las cundiçones ouperacionales para lhargos cachos de tiempo de begila.

Desta maneira, la Movhera ten muita proua an poder ajudar a acoutelar ls fogos ne l termo adonde stan las sues barraiges, ajudando a resguardar l ambiente na region.

14 de julho de 2021.

La Movhera apersenta la sue páigina d’anternete an Mirandés

Açpuis la mudança de la sue casa pal Cunceilho de Miranda, la Movhera acaba de apersentar la sue páigina corporatiba d’anternete, an Mirandés. Cun esta einiciatiba, que tubo la colaboraçon de la ALCM – Associaçon de la Lhéngua i Cultura Mirandesa, la Movhera cunfirma l sou cumpromisso cun la cultura i l zambuolbimiento de la region que stá ne ls liçaces de la sue atebidade.

08 de maio de 2021.

La Movhera acuolhe faborablemente porjetos de reabelitaçon de la antiga pedreira an Miranda

Ne l campo de l sou cumpromisso cun l zambuolbimiento de la region adonde stan las sues cuncessones, la Movhera acuolhe de maneira faborable qualquiera porjeto que seia capaç de reabelitar ls terrenos dessa pedreira an Miranda, criada hai 60 anhos ne l tiempo an que la barraige fui feita nesta cidade.

Na oupenion de la Movhera, esse porjeto alhargarie la atratebidade turística de la region, ajuntando más un fincon de atraçon a la infrastrutura que yá hai (cumo por eisemplo ls barcos de cruzeiro, ls carreirones para caminadas, etc.) que fui purparada por la antiga cuncessionaira.

Nesse sentido, la Movhera stá çponible para ajudar de beras nun studo a lhançar, cun la cuntribuiçon i aprobaçon de las antidades públicas cumpetentes, assi cumo ha de facelitar la antrada nesses terrenos, que stan andrento de la cuncesson, se por un acauso se resolbir abançar cun trabalhos nesse sítio.

23 de abril de 2021.

Movhera renoba colaboraçon cun l “Grupo Nordeste” por 4 anhos, para resguardar l meio ambiente i la biodebersidade

La Movhera renobou por 4 anhos l sou cumben cun l “Grupo Nordeste”, que ye formado por las associaçones APFNT - Associação dos Produtores Florestais do Nordeste Transmontano, PALOMBAR - Associação dos Proprietários de Pombais Tradicionais do Nordeste, e AEPGA - Associação para o Estudo e Proteção do Gado Asinino.

Ne l campo deste cumben, las trés associaçones ban a monitorizar i assigurar las Medidas Ambiantales yá an uso para afrouxar ou anquelibrar l ancuntron de las barraiges de l Baixo Sabor i Feiticeiro:

• Mantenéncia de ls termos cun florestas i la sue porteçon de ls fogos;

• Porgramas de porteçon de speces que habitan ne l campo de l ancuntron de las açudas: aiglas, mamifros d’auga (lhontra i rata d’auga), bornaciegos, lhobos.

Ls trabalhos cumbinados son assigurados por 16 colaboradores locales.

Por meio dessas einiciatibas cuncretas, la Movhera queda prouista por ajudar al resguardo de l meio ambiente i a la biodebersidade de la region adonde stan ls sous atibos, bien cumo zambuolber l amprego local.

Para más anformaçones suobre las associaçones, acunselhai-bos eiqui:

31 de márcio de 2021.

L Cunceilho Giral de la Movhera aproba la morada durareira de la ampresa.

Apuis dun porcesso de registro ampeçado a meio de márcio, l Cunceilho Giral de la Movhera assigurou hoije la localizaçon duradeira de la sue casa ne l Cunceilho de Miranda, quedando desta maneira más acerca de ls atibos de la ampresa que stan ne l Douro Anternacional, assi cumo de la Engie Hidroelétricas do Douro. Cun este passo, quedamos agradados an assigurar l nuosso cumpromisso cun l zambuolbimiento eiquenómico de la region que stá ne l liçace de la nuossa atebidade.

24 de dezmbre de 2020.

Marca nuoba
Movhera bei a la lhuç de l die.

La Movhera ye ua ampresa criada hai mui pouco tiempo i que goberna l sigundo maior portfolio heidroeilétrico de Pertual, dantanho ouperado por la EDP. La eidentidade de la marca Movhera acuolhe la neutralidade carbónica, mobimiento i dinamismo. Quier pormober l abseluto respeito por l ambiente i ten fé na criaçon de relaçones fuortes i an acuordos duradeiros cun las quemunidades i partecipantes locales.

17 de dezembre de 2020.

La ENGIE, Crédit Agricole Assurances i la Mirova fechan la transmisson de l portefolio heidroeilétrico pertués de 1,7 GW que era de la EDP.

A 17 de dezembre, l cunsórcio cumpuosto por la ENGIE, Crédit Agricole Assurances i la Mirova cerrórun la transmisson de 6 cuncessones heidroeilétricas an Pertual. Agora que la transmisson fui acabada, la manobra de las barraiges de Miranda, Picuote, Bempuosta, Baixo Sabor, Feiticeiro i Foç Tua fúrun passadas pal cunsórcio. A la par, nace ua nuoba marca Movhera.