Ls nuossos serbícios
La Movhera ajuda pa la Mudança Einergética produzindo einergie berde i ajustable. L nuosso crer ye de que todos ls serbícios han de crecer an amportáncia, a la par cun l zambuolbimiento de la einergie renobable an Pertual.
La Movhera ouferece dues catadories de serbícios:
Bendemos i mercamos letecidade ne ls mercados.
Fazemos serbícios cumplementares a la REN – Redes Einergéticas Nacionales, l ouperador de la rede eilétrica, l que permite dar respuosta a las bariaçones de la carga.
Ls atibos de la Movhera son fundamentales pa la Mudança Einergética.
Las Fuontes de Einergie Renobables (FER) ténen que ser zambuolbidas para se alcançar ua eiquenomie neutra an carbono i lhuitar acontra l calcimiento global. Las FER ténen tamien la einergie eilétrica, eiólica i solar i inda la biomassa.
Las barraiges cumo las que son gobernadas pula Movhera son fundamentales nesta mudança porque fornecen einergie sien arramar carbono. Ls nuossos 1,7 GW de capacidade produzen arrimado a 3,2 TWh por anho, l que repersenta l gasto de todas las casas de l termo metropolitano de l Porto.
Además, tamien ouferecen la ajustablidade de que precisa l sistema eilétrico, fazendo cun que haba un crecimiento más dalgeiro i ua antegraçon más delicada de las outras fuontes renobables, que son na maior parte antermitientes. An particular, las anstalaçones de Foç Tua, Baixo Sabor i Feiticeiro stan eiquipadas cun ua capacidade de bumbaige (somando 450 MW) fazendo cun que la capacidade de armazenaige de la represa trabalhe cumo ua bataria an lharga scala. Quando las restriçones fízicas de la manobra crian einergie a más ne l sistema, essa sobra puode ser ousada para bumbar auga. La einergie armazenada puode ser ousada cumo ua capacidade de reserba para sastifazer cronas de necidade.
Zampenhamos un papel cada beç más amportante ne ls mercados einergéticos.
Las redes eilétricas han de percisar cada beç más de einergie ajustable para assigurar l sou anquelíbrio. L zarmar de las centrales de carbon, l sumir de la capacidade nuclear, planeada até 2030 an Spanha, associadas al zambuolbimiento de las einergies renobables (la einergie solar fotoboltaica na Península Eibérica puode passar a más de l dobre antre 2020 i 2030) alhargan la necidade de einergie heidroeilétrica anquanto fuonte de einergie ajustable. Estas tendéncias lhieban a que creça la pouca sigurança intra-diária de ls précios de la letecidade na Península Eibérica, cun précios baixos a meio l die (grande produçon fotoboltaica que lhieba a ua demasia de la produçon) i précios altos durante las nuites (baixa produçon fotoboltaica, a que se soma maior necidade an alumiar).